講起倫敦其中一間比較出名嘅聖堂，除咗西敏主教座堂之外，莫過於坐落喺South Kensington嘅聖母無玷之心堂，因為呢間聖堂係由聖斐理伯內利司鐸祈禱會（又稱「經堂會」）嘅會士管理，所以當地教友通常不正確地稱為「布朗普頓聖堂」（Brompton Oratory）或「倫敦經堂會聖堂」（London Oratory）。
喺1852年嘅時候，經堂會會士法伯神父（F. Frederick William Faber）喺查令十字區（Charing Cross）附近建立倫敦經堂會團體，其後喺1880年搬到去South Kensington重新建立，並且喺1884年聖堂落成並舉行隆重祝聖典禮。
對於一班傳統天主教徒嚟講，依家聖堂係其中一間對於禮儀同埋音樂嚟講非常之出名嘅聖堂，因為佢哋主日同埋平日嘅彌撒都會以拉丁文去舉行，尤其係喺主日11:00am嘅彌撒，佢哋係會用依家嘅羅馬新禮Novus Ordo去舉行一台拉丁文主日大禮彌撒，而且佢哋每日朝早都會舉行一台舊禮儀嘅拉丁彌撒，所以如果大家有機會嘅話，不妨可以去Brompton Oratory呢度參加彌撒。
今次落到嚟倫敦，除咗俾我自己放四日假之外，主要都係想參加新任西敏教區總主教Richard Moth嘅就職禮。
不過可惜嘅係，雖然佢聽日先正式就職，而聽日嘅隆重就職大禮彌撒係唔會公開比其他教友參禮，不過啱啱頭先夜晚就舉行咗一台公開嘅隆重晚禱禮儀，所以我都趁機會參加咗呢一台嘅隆重晚禱禮儀。
無論點都好，懇請大家繼續為新一任西敏教區總主教Richard Moth祈禱。
PS：最搞笑嘅係，喺完咗禮儀之後，無端端咁都俾我撞到我哋Walsingham Basilica嘅Father Rector…
俾埋一個預告大家，嚟緊呢幾日我會介紹一啲喺倫敦比較出名嘅聖堂。
一般香港人甚至乎華人，對於墳場嘅First Impressions，就係陰森同埋恐怖，基本上冇咩事嘅就唔好入墳場。
相反喺英國，佢哋嘅墳場嘅感覺係比較上舒服同埋平靜，而且大部份英國嘅聖堂都會喺後園設立墳埸，俾一啲屬於嗰間聖堂嘅教友將來走咗之後可以喺聖堂嘅墳埸嗰度安葬。
上個星期，趁住放假唔使返工，小弟就去咗喺Walsingham入面一間叫做「聖瑪利亞及諸聖堂」（St. Mary and All Saints Church）嘅聖公會聖堂嗰度參觀，而咁啱聖堂後園係設有墳埸，所以小弟就去咗聖堂後園嘅墳埸嗰度兜個圈，順便為一眾亡者祈禱。
聖堂後園嘅墳埸大部份都係安葬咗呢間聖堂嘅堂區教友同埋一啲曾經喺Walsingham服務嘅聖公會神職人員。
值得一提嘅係，呢個墳埸入面，其實安葬咗一位天主教嘅神父，而佢就係Augustine Hoey蒙席，佢本身係一位聖公會神職人員，喺1995年改信咗天主教後被祝聖成為神父，其後更加被教宗方濟各冊封做「陛下專職司鐸」（Chaplain of His Holiness），並授於「蒙席」頭銜，佢係2017年以102歲高齡喺Walsingham呢度安息主懷，佢個骨灰安葬咗喺聖瑪利亞及諸聖堂後園嘅墳埸。
如果大家想了解多啲有關Augustine Hoey蒙席，可以Like同Follow佢嘅紀念FB Page：Monsignor Augustine Hoey – 1915-2017 。
首先喺度祝大家新年快樂、身體健康、主寵日隆！
話咁快就嚟咗Walsingham Basilica呢度做嘢同埋定居啱啱滿一個月，真心我諗都冇諗到咁就已經一個月，喺呢一個月入面我真係學咗好多嘢，包括點樣去處理世界各地唔同嘅嘅教友寫上嘅祈禱意向、奉獻九日敬禮彌撒、同奉獻七日蠟燭，以及協助我嘅修女同事統籌喺我哋聖堂嘅朝聖活動。
其實Father Rector前排同我都講過，話我嚟得真係啱啱好，因為我12月頭嚟到嘅時候，咁啱係冇朝聖團過嚟我哋呢度，所以我有差唔多兩三個月嘅時間去學習加適應呢度嘅環境運作，等到嚟緊今年三月開始就會熟習呢度嘅運作，去應付一啲大型嘅朝聖團。
而好慶幸嘅係呢度嘅神父（包括Father Rector、Fr. Sunday、Fr. Eric）同埋我嘅修女同事喺呢過去嘅一個月入面悉心咁教我呢度嘅運作，小弟本人表示倍感恩惠。
懇請大家繼續為我祈禱！
嚟咗Walsingham Basilica呢度做嘢話咁快已經接近差唔多一個月，喺呢一個月入面我發現咗一樣嘢…
平時我哋Walsingham Basilica嘅12:00pm平日+主日彌撒，基本上有一半嘅教友係印度籍，另外一半係Local本地嘅英國教友。
所以我啱啱喺一個月前嚟到嘅時候，我曾經懷疑過自己究竟係嚟咗英國定係嚟咗印度？
早幾日我同我哋Walsingham Basilica嘅主任司鐸Fr. Robert Billing（aka Father Rector）一齊傾偈嘅時候，喺佢嘅口中得知，呢班印度籍嘅教友，大部份都係嚟自印度嘅Kerala（喀拉拉邦），大部份都係喺Walsingham入面定居同埋打工，而且有四位同我一齊做嘢嘅修女，佢哋全部都係嚟自Kerala。
同埋如果平時彌撒係由Father Rector主禮嘅話，佢喺彌撒開始嘅時候都會以Kerala嘅語言Malayalam（馬拉也林語）同一班印度籍嘅教友致候。所以平時我喺Office入面，聽得多嘅除咗英文之外，就係Malayalam，再係咁落去我諗緊嚟緊有時間嘅都可能學返一兩句Malayalam，等我可以同呢度嘅印度籍教友搭嗲。（笑）
所以我哋Walsingham Basilica可以講笑咁講，其實係一間印度Kerala教友嘅堂區，不過始終本地Local嘅英國教友嚟我哋呢度參加彌撒都係比較上佔大多數。
今日適逢係聖家節，兼且今日我係放假，所以我喺Walsingham Basilica望完聖家節主日彌撒+去完Fakenham買餸之後，趁晏晝仲有少少時間就去咗聖公會嘅Walsingham Shrine嗰度參觀，順便入去參觀佢哋入面嗰間「聖屋」。
究竟呢間「聖屋」係乜嘢嚟嘅呢？我諗係時候要開啟我嘅講故佬模式：
相傳喺1061年嘅時候，聖母係Walsingham呢度顯現俾一位叫做Richeldis de Faverches嘅一位女教友，叫佢喺Walsingham呢度起一間「納匝肋聖屋」（即係聖家佢哋係納匝肋嘅屋企），之後Richeldis答應咗聖母嘅請求，就喺Walsingham呢度起咗間納匝肋聖屋嘅「複製品」。所以點解Walsingham係有一個稱號係叫做「英格蘭的納匝肋」（England’s Nazareth）。
其後呢一間「聖屋」由聖奧斯定詠禮會（Augustinian Canon）嘅會士管理，並且喺呢間「聖屋」所在嘅位置起咗間好大嘅修院，即係現時嘅Walsingham Priory。
喺16世紀嘅時候，因為當時嘅英國皇室打壓天主教會，「聖屋」同埋Walsingham Priory全部被摧毁，現時大家見到嘅呢一間「聖屋」，係喺1930年由一班聖公會嘅神職人員喺「聖屋」嘅原址上重新建立，並且建立現時嘅聖公會嘅Walsingham Shrine聖堂。
喺「聖屋」 嘅後面，有一個聖井，相傳呢一個聖井入面啲水係有治病嘅功能，所以有好多嚟Walsingham朝聖嘅教友都會去飲呢度聖井嘅水，祈求聖母可以醫治佢哋嘅疾病。
題外話：聖公會Walsingham Shrine嘅聖餐禮儀，啲經文同埋禮儀形式，全部同我哋天主教嘅彌撒係一模一樣，究竟係點嘅呢？遲吓有機會再同大家分享。
喺我呢個新網誌嘅第一個文章，就同大家分享一下我依家喺Walsingham Basilica做緊嘅工作。
我嘅工作係「彌撒及朝聖者辦公室助理」（Mass and Pilgrimage Office Assistant），其實係乜嘢工作嚟嘅呢？
係咁嘅，因為我依家呢度嘅聖堂其實係一個叫做「國家級朝聖地」，差唔多有世界各地嘅教友都會喺我哋聖堂嘅網站寫上祈禱意向、奉獻九日敬禮彌撒、同奉獻蠟燭，之後呢啲嘢就會send落我哋嘅email，而當我收到呢啲email，就即刻代呢班教友為佢哋寫上祈禱意向、奉獻九日敬禮彌撒、同奉獻蠟燭，之後我就會send返email俾佢哋話我已經做代佢哋晒呢啲嘢。
再加上我其中一個工作，就係協助統籌喺我哋聖堂嘅朝聖活動，因為我哋每一年都會有唔同嘅英國教區或者一啲團體會過嚟我哋呢度朝聖，而我嘅工作，就係同一班教區或者團體嘅朝聖負責人去一齊統籌佢哋嘅朝聖活動。
而且另外大家都知道，我自己本身係一位輔祭，我間唔中喺有需要嘅時候會喺我哋聖堂嘅每日12:00pm彌撒入面輔禮。
平時返工我係返9:00am，放工就不定時，通常平時就係放5:00pm，但因為呢幾日係聖誕節，所以就提早收工放3:00pm。而且平時放假我係放逢星期六同星期日。
今次同大家講住咁多先，下次如果得閒有機會嘅再同大家分享我喺Walsingham嘅日常生活。
